تكات جميع انواع المحاشى

‫#‏مطبخ_دعاء_عاشور‬

- الكرنب
بابخر ورق الكرنب بيدى طعم مختلف تماما غير المعمول بالطريقة العاديه
يعنى بعد ما باسلق الكرنباية وباقطعها باجيب حله كبيرة وباحط ورق الكرنب فيها وبعدين أولع فحمايه وأحطها على معلقة سمنه وأغطى الحله بفوطة مبلوله وممكن أكرر الموضوع دة تلات مرات بس النتيجة بتكون أطعم بمرااااحل من الطريقة المعتادة

- المحشى لما اعمله احط مع التخديعه نعناع اخضر او ناشف بيديوله برده طعم حلو اوى وشويه قرفه

لما بتيجى تحشى الباذنجان الأسود تحطى زبيبة فى قعر البتنجانة عشان تقريبا بيقى قعرها مر شوية..
نعناع ناشف فى خلطة المحشى بيبقى روعة وكمان بفرم قرن شطة مع الطماطم بتاعت تقلية المحشى خطيرة وبحط فى قعر الحلة بتاعت المحشى قبل ما ارص المحشى طرنشات طماطم وبصل و2قرن شطة وطبعا بكون متبلاهم بكمون وفلفل اسود وذرة ملح وبالهنا والشفا
الكرنب وانا بسلققه بحط فى الماية مع الكمون والملح شوية زيت علشان الورق يلمع ويبقى مفلفل فى الحلة

- لما بعمل فراخ محمرة جمب المحشى
بحط شوية من الزيت بتعاع التحمير او السمنة على المحشى بعد ما يستوى والزيت سخن بيديله طعم هايل
أحط ملعقتين سكر و3 ملاعق خل في خلطة المحشي بيقى تحفه طبعا كل
واحده وطريقتها في عمل الحشوه

- محشى الفلفل الرومى علشان الفلفل بيبقى مسكر شوية بدهن الفلفة قبل الحشو شوية ملح صغييرين جدااااامن جوه

-وخلطه المحشى بحطلها الخضره فى الاخر خالص بعد مااطفى النار
المحشى وهو بيتردد على النار بحط ملعقه كبيرة قشطه بتدى ريحه هايله

- المحشي بقى بعمله بزيت مش بسمنة بيبقى خفيف وكمان وانتى بتقدميه تلاقى الزيت مديله لمعة حلوة
وبحب اضيف على الورق عنب وهو بيستوي رشه قرفه وعصير ليمونه وزيت زيتون

- المحشى
حطى التوابل على البصل والزيت وضيفى نعناع ناشف وقرن فلفل رومى
ومع الطماطم اضربى قرن فلفل احمر وبعد التسبيكة والرز حطى بصلاية على الرز ناية متبلة بملح وفلفل

- محشي ورق العنب
باضيف ملعقه زيت للشوربه اللي باسويها بيه بتديله لمعه حلوه

- الحمام المحشي مش تسوي الرز قبل الحشو وكمان بعد تحمير الرز بالبصل والثوم والبهارات حطي على الرز بصله مبشوره نيه
للحمامه الواحده بيبقي شوية في بطن ايدي كده عشان ميبقاش كتير والحمامه تنفجر

- خلطة المحشي
نعناع ناشف +كرفس متقطع صغير جدا مع الخضرة +قليل من الجنزبيل بودر وبهارات اللحمة وكاري

-الشوربة بتاعة المحشى عشان ياخد لون حلو حطى معلقة صلصة ومعلقة زبدة ع الشوربة ودوقى وادعيلى

- الممبار بضيف للخلطه بتاعته معلقتين صغيرين قرفه بتفرق كتير في الطعم

- والكوسة بتاعة المحشى رشى ملح وفلفل عليها من جوة
- الكوسه لما بقورها عشان ما تتكسرش بحطها شويه في ميه مغليه وبعدين اقور المقوار بيجري فيها وبتكون سهله جدا.