تكات الارز بجميع الطرق

‫#‏مطبخ_دعاء_عاشور‬

أولا : الأرز:
أى نوع رز باعمله لازم أحوره فى أى مادة دهنيه الأول عشان يفلفل
يعنى مش باسقطه فى الشوربه لأ أديله تشويحة الأول وبعدين أسقطه عليه الشوربه أو حتى الميه
و ساعات باقطع فلفل رومى مكعبات على الرز الأبيض...بجد طعم وهمى و كأنك سقياه بشوربة خضار وكمان ان لما تحطى الملح على الرز بعد ما تقلبيه فى الزيت شوية بيكون طعمه احلى من لو حطيتى الملح على المية(و طبعا انتوا بتشوفوا ازاى الهنود فى التليفزيون بيحطوا البهارات و يقلبوها تقليبة فى الزيت عشان نكهتها تطلع) تحطي معلقه سمنه و اول ما تقدح حطي فص مستكه و حطي الرز و الملح

- الرز بالكبد والقوانص
بحط فيها نعناع ناشف
ورز السمك احط فيه قرفة بيبقي تحفة
والرز الابيض شوية جنزبيل بيدي طعم في كل حاجة
لما بفلفل الرز اللى هو حبه وحبه ولما بضيف الرز عشان يتحمر بضيف رشه ملح بيمنع التصاق الرز ببعضه وميتعبكيش وانتى بتفلفليه فى تكيك الرز من بعضه

- لما نحضر زبيب لوجه أي نوع من البرياني أو الرز المخلوط
نحمر بصله ناعمه جدا + 1/2 ملعقه صغيره كركم + الزبيب المغسول والمصفى ويقلب حتى ينتفخ وينثر مع اللوز فوق الرز
رز السمك طبعا بالقرفة والجنزبيل وكمان بالجزر المبشور بيبقى روعة
ولما يكون عندي أرز بايت وعاوزه اغير اضيف ليه كوب لبن مضروب فيها بيضه وبشر جبنه رومي وادخله الفرن
الرز بيتنقع فى ميه الاول قبل الطبخ ولو هعمله بالكركم بنقعه فى ميه فيها كركم وبشوحه مع فصين حبهان وبضيفله شوية قرفه وكارى وشويه فلفل اسمروالملح .واديله شوربه بيبقى روعه

- اما الرز بالسى فود بقى
طبعا هتبقى الحاجة متبلة وبعدين بصله كبيرة مبشورة هنحمرها شوية فى الزيت ونضيف عليها السى فود ونشوحهم كويس لمده 5 الى 7 دقايق
وبعدين معلقة صلصة صغيرة نحط مية الرز ونقطع فيها نص ربطة كرفس على شبت وكمون وفلفل اسود وملح بعدين الرز
ولو عاوزين الرز اصفر يبقى بلاش صلصة ونحط كارى وشوية كركم

- الرز
لما تعملية بشعرية او واحدة وواحدة حطى الملح وشوحيها شوية وضيفى الماية تكون بتغلى

- الرز المفلفل اللى بالشوربة والملح والفلفل الاسمر
بضيف من عيارة كوب لبن ومعلقة قشطة وادخلة الفرن فى طاجن يكمل سواة
الارز الابيض العادي لما بحط عليا الميه او الشوربه حسب يعني
بحط عليه ربع كوبايه لبن مش بيعجن مني خالص وبيبقي طعمه تحفه
الرز المعمر بدخل مع اللبن كوب كريمه لباني بيخليه مش بس معمر لا كمان معتبر
بحط معلقة خل على الرز مع الشوربة بتخليه بيلمع ومفلفل مافيش حباية ماسكة فى التانية
الرز لو مستعجله على سواه هاتى كيس بلاستيك نضيف وحطيه على الرز وغطيه كويس بالكيس وبعدين غطيه بالغطا ده علشان يكتم البخار

- الرز الاصفر
بحب احط ف الحلة الاول شوية زيت او سمنة ومعاة مكعبين ماجى وعليهم الكركم وشوية كاااارى وشوية قرفة وشطة ونقطتين ليمون
واول ما كل دة يسخن ف الزيت ويطلع ريحة ضيفى الرز المغسول وقلبى كويس اووووى وبعدين حطى الملح والمية او الشوربة
الرز المعمر مش بحط له سمن خالص بس بنقع الرز نص ساعة وبعدين اصفيه كويس واقلب عليه شوية قشطة من وش اللبن الى بحوشه فى الفريزر واحط فى الطواجن وعليه اللبن وعلى الوش معلقة قشطة بتحمر الوش وتخلى الريحة تحفة ولما يطلع من الفرن يكون ناشف اغطيه 5 دقايق يعرق ويطرى ويبئى تحفة

- رز السمك البنى حمرى البصلة جامد وحطى عليها شوية شطة وكمون ومعلقة صلصة وبعدين المية بيطلع رهييييييييب

-رز بالشعرية
حمرى الشعرية وضيفى عليها الرز ياخد تشوحتين معاها وبعد كده ضيفى عيار الميه بتاعته والملح وقلبيهم التكه بقى ضيفى قليل من الفلفل الأسود طعمه بيقى جميل جدااااااا بس يكون الرز مش منقوع

- الرز فى الفرن قبل ما أدخله الفرن بحط على وشه وش اللبن

- ماء الارز نقطتين ليمون يجعله ناصع البياض
- رز السمك عشان يكون روعه
بانقعه شويه في الميه ولما بسويه قبل ما اقفل عليه بحطله شويه كزبره خضرا بيكون وهمي كمان بحطله في السوى حته خلطه من بتاعه السمك..