طاجن اللحمه بالبصل

من طرف duaa الخميس فبراير 16, 2017 2:01 pm

المقادير

2/1 كيلو لحمه مقطعه مكعبات صغيره-4/1 كيلو بصل اورمه(اللي هو البصل الصغير) - 2/1 كيلو طماطم من غير قشر ومقطعه مكعبات-2قرن فلفل أخضر أو ألوان مقطع مكعبات -1 بصله مقطعه مكعبات صغيره-5 فصوص توم مفرومين-2 معلقه صويا صوص-1 كوب عصير عنب(ما تستغربوش هي دي حاجه جديده)-ملح -فلفل -شطه -قرفه -زعتر -كزبره ناشفه -ورق لوري

الطريقه

في طاسه علي النار نحط معلقتين سمنه ونضيف ورق اللوري والبصل المقطعه ونشوحهم وبعد كده نضيف الثوم مفروم ونشوحه يدوب يذبل ونضيف اللحمه المكعبات ونديها صدمه وبعدين نقلب لحد ما لونها يتغير وتبدأ تنزل مايه ونضيف الطماطم وزي ما قولنا من غير قشر (ولو عايزه تقشري الطماطم بسهوله حطيها في الفريزر ولما تطلعيها وتبدأ تفك هتلاقي القشره بتتشال بسهوله)هنسيبهم علي النار شويه وبعد كده هنضيف الصويا صوص ونضيف عصير العنب ونسيبهم شويه علي النار وفي نفس الوقت بنجيب طاسه تانيه ونحط فيها معلقه زيت ونشوح فيها البصل الاورمه وهنضيف الفلفل الالوان والشطه ويدوب نشوحهم تشويحه خفيفه (احنا بنشوحهم لوحدهم مش مع اللحمه عشان مش يتهروا) وبعد كده هنضيفهم علي اللحمه ونقلبهم ونحطهم في طاجن هنغطي الطاجن بورق فويل وندخله الفرن حتي يستوي....ويقدم بالهنااااااااااااا....