قطايف بالبلح (جديده)

المقادير
كيلو قطايف-كيلو بلح-ملعقة صغيرة قرفة-1/2 كوب زبدة-1/2 كوب لوز مبشور

مقادير الشربات
1/2 كوب سكر-3/4 كوب ماية-عصير ليمونة-فانيليا

الطريقه
1-هاتي البلح وانقعيه لمدة 4 ساعات في الماية وبعد كده شيليه من الماية وقشريه وشيلي منه النوى وقطعي البلح إلى قطع صغيرة
2- هاتي طاسة وحطيها على نار هادية ودوبي فيها الزبدة وبعد كده ضيفي إليها البلح وقلبيهم مع بعض كويس وبعدين رشي القرفة واستمري في التقليب لغاية ما تلاقي إن البلح بدأ يدوب بعد كده هاتي اللوز المبشور وضيفيه إلى البلح واستمري في التقليب لمدة عشر دقائق كمان وبعد كده ارفعي الخليط من على النار وسيبيه لغاية ما يبرد
3- هاتي القطايف واحشيها بالخليط ده وخدي بالك إن الحشو ده يكون في وسط قرص القطايف اقفلي قرص القطايف بالضغط عليه بإيدك وخدي بالك إنك تتأكدي من عدم وجود أي حشو ظاهر
4-سخني فرن البوتاجاز وهاتي صاج للفرن وادهنيه بشوية زبدة ورصي فيه القطايف وادهني وجه القطايف بالزيت ودخليها الفرن لمدة 7 دقائق وبعد كده خرجي الصاج وقلبي القطايف على الوجه الآخر وادهني وجها بالزيت ودخليها الفرن مرة كمان لمدة 7 دقائق وبعد ما القطايف وشها يحمر خرجيها وصبي عليها الشربات....

او تقليها فى زيت

طريقة عمل الشربات....
حطي السكر والماية كلهم مع بعض في كسروله على نار هادئة لمدة ربع ساعة بعد كده ضيفي الليمون وسيبيه لمدة 5 دقائق لغاية ما يغلي وبعد كده حطي الفانيليا وشيليه من على النار وسيبيه لغاية ما يبرد..