حفظ اللحوم

علشان الشهر رمضان الكريم...
-يفضل إنك قبل ما تشيلي اللحمة في الفريزر تقطعيها لقطع صغيرة اللحوم الحمراء
-يفضل إنك قبل ما تشيليها في الفريزر إنك تقطعيها لقطع صغيرة مناسبة مع الحجم اللي إنت بتطبخي به وبتشيليها في الفريزر من غير ما تغسليها
لأن الرطوبة العالية ممكن تتسبب في إن اللحمة تفسد بسرعة وكمان يفضل إنك تشيلي قطع الدهون اللي تكون موجودة على اللحمة من بره
-ولما بتيجي تطبخيها يفضل إنك تطلعيها وتحطيها في الثلاجة قبل الوقت اللي هتطبخيه فيها بـ10 ساعات يعني ممكن تطلعي كيس اللحمة أول ما تصحي من النوم الصبح ولما ترجعي من الشغل تشطفي اللحمة بالمية وتسويها على النار بالطريقة اللي إنتى عايزاها سواء مع الخضار أو تعملي بها كباب حلة أو أي صنف إنتِ عايزاه
-بس خلي بالك وإنتى بتقسمي اللحمة في أكياس الحفظ أو في الأطباق الفِل إنك تحطي في كل كيس الكمية اللي تكفي لوجبة على حسب عدد أفراد أسرتك علشان ما تضطريش إنك تجمدي اللحمة اللي هتتبقى بعد ما تسيح
لأن تجميد اللحمة بعد تسييحها ممكن يسبب إن اللحمة تتلف أو يتغير طعمها
-وبعد ما تقسميها تخلصي من الهواء الزيادة اللي موجود في الكيس وحطيه في الفريزر ويفضل إنك تحطي اللحمة على سطح الفريزر مباشرة
-وعلى فكرة إنتى ممكن تغسلي اللحمة وتشوحيها على النار لمدة 5 دقايق قبل ما تشيليها في الفريزر مع شوية ملح وفلفل وبعد كده تسيبيها تبرد خالص وبعدين تقسميها في الأكياس وتشيليها في الفريزر بنفس الطريقة اللي قولنا عليها وبكده تبقى اللحمة جاهزة عندك ولما تحتاجيها في أي وقت هتطلعيها من الفريزر وتحطيها على النار مباشرة ومش هتستني لما تسيح وتعمليها بعد كده بالطريقة اللي إنتى عايزاها
*أما اللحمة المفرومة فإنتى ممكن تعصجيها وتسيبيها تبرد قبل ما تشيليها في الفريزر وتقسميها على أكياس وتفرغي منها الهواء وبكده تبقى جاهزة عندك علشان تعملي بها صواني المكرونة بالبشاميل والجلاش باللحمة المفرومة والمسقعة وكمان تقدري تحشي بها البطاطس
-ودي طريقة تتبيل اللحمة المفرومة وهي
إنك تجيبي بصلة وتقطعيها لقطع صغيرة وتشوحيها على النار في سمن أو زيت وبعد ما البصل يتحمر شوية حطي اللحمة المفرومة والبهارات والملح وسيبيها على النار لغاية ما تتعصج...
...رمضان كريم...