طاجن لسان العصفور بالكبد والقوانص

من طرف duaa السبت فبراير 18, 2017 5:47 pm

المقادير

2 ونصف كوب لسان العصفور - نصف كيلو كبد وقوانص - 2 بصله مقطعة قطع صغيرة - ثمرة فلفل أخضر مقطعة حلقات - 3 ملعقة كبيرة صلصة طماطم - مكعب مرقة دجاج - 2 ملعقة كبيرة زيت - ملعقة كبيرة خل - 3 فص حبهان - 4 كوب مايه - فلفل أسود

الطريقة

1 - اغسلي الكبد والقوانص كويس وبعدين سيبيهم على جنب علشان المايه تتصفى وبعد كده تبليهم بالخل والفلفل الأسود لمدة ربع ساعه

2 - اغسلي الكبد والقوانص مرة تانية وقطعيها لقطع متوسطة وسيبيها على جنب وبعدين حمري لسان العصفور في الزيت على النار لحد ما يبقى لونه ذهبي وبعد كده شيليه من الزيت وسيبيه على جنب

3 - شوحي البصل في نفس الحلة اللي حمرتي فيها لسان العصفور على النار لحد ما يدبل ويبقى لونه أصفر وبعدين ضيفي عليه الكبد والقوانص والحبهان وقلبيهم مع بعض على النار لحد ما يستوي وبعد كده ضيفي عليهم لسان العصفور وقلبيهم مع بعض على النار لعدة دقائق

4 - ارفعي الخليط من على النار وحطيه في الطاجن وبعدين حطي صلصة الطماطم على النار وضيفي عليها المايه ومكعبات مرقة الدجاج واستني لحد ما الخليط يغلي وبعدين ارفعيه من على النار وصبيه على الطاجن وزينيه بحلقات الفلفل الأخضر وبعد كده دخّلي الطاجن فرن درجة حرارته 180 درجة لمدة 25 دقيقة وقدميه وبالهنااا..