قصة العودة الي المدرسة

‫#‏قمر_البيت_لكل_ست_بيت

كان يا مكان كان فيه بنوته اسمها سما
سما كانت عندها 5 سنين وبتحب مامتها وعائلتها اوووي بس هي السنادي كانت داخله المدرسه كي جي 1 سما كانت خايفة اوي من المدرسة لانها حتكون لوحدها ومش مع ماما ولا بابا وتفضل تقول لماما
ماما انا مش عاوزة اروح المدرسة يا ماما انا حكون لوحدي وانا بخاف اكون لوحدي ومش حلاقي حد اقعد معاه هناك يا ماما وتفضل سما تعيط

ماما تقول:
ليه بس يا سمسم متخافيش يا حبيبتي المدرسة حلوة وحتشوفي لما تروحي اول يوم وهناك حتلاقي مدرستك الجميلة وصحابك كلهم حيروحوا المدرسة وبعدين احنا بنروح المدرسة علشان نتعلم علشان ربنا يحبنا ولا ايه ؟

سما ترد وتقول :
بس انا بردو بخاف اروح لوحدي وافضل هناك لوحدي من غيرك يا ماما انتي وبابا
ماما ترد وتقول :متخافيش يا سمسمة انتي حتكوني مع صحابك اللي بتحبيهم المهم يجي اول يوم في المدرسة وسما ماشية مع بابا وماما لمدرستها وهي بتعيط وخايفة تدخل سما الفصل بتاعها وتلاقي مدرستها الجميلة

0 حسناء 0
حسناء : صباح الخير يا سما اخبارك ايه ؟؟ الفصل عجبك ؟
وتروح تبوسها علي خدها وتدي سما شوكولاتة في ايديها وتبتسم سما وتودع بابا وماما ويمشوا سما تفضل قاعده في الفصل مع صحابها وتفضل تشوف اد ايه المدرسة حلوة واد ايه ميس حسناء طيبة ويجي وقت الفسحة وسما تخرج تلعب مع اصدقائها علي المرجيحة والزحليقة و يجي اخر اليوم وتروح سما مع بابا وماما وتقول لماما وبابا
المدرسة حلوة اوي وانا استمتعت باليوم جدا وكمان اتعلمنا اول حرف من اللغة العربية وهو حرف الألف ( أ ) والمدرسة حلوة وبتعلمنا وبتخلينا فرحانين كمان لازم كل ولد وبنت يحبو المدرسة علشان يتعلموا فيها وتوتة توتة خلصت الحدوتة ..