قصة القطة بسبوسة وبيضة الفرخة جميلة جدا

‫#‏قمر_البيت_لكل_ست_بيت‬..
كان فى قطه صغنتوته اموره اسمها ( بسبوسه)
بسبوسه بدأت تكبر وتشوف العالم من حواليها وكانت ذكيه وبتحب تتعلم كل حاجه وبتسأل على كل حاجه -دى اسمها ايه ياماما
-دى اسمها ورده
-ودى اسمها ايه ياماما
-دى اسمها شجره
ودى اسمها ايه ياماما
-دى اسمها بيضه
الله القطه بسبوسه عجبها شكل البيضه قوى وقالت لماما البيضه دى جميله قوى وكمان طعمها لذيذ
احنا بنجيب البيضه منين ياماما؟ الفرخه ياحبيبتى هى اللى بتبيض البيضه تعجبت بسبوسه اكتر واكتر وقالت الفرخه؟ وفضلت بسبوسه مشغوله بالحكايه دى وبتفكر وبعد كام يوم بسبوسه كانت بتتمشى شافت الست فرخه بسبوسه قالت صباح الخير ياست فرخه الفرخه قالت بصوت عالى
بك بك بكاااااااك بك بك بكاك بك بك بكاك وكانت عماله رايحه جايه اكنها بتدور على حاجه وقعت منها فى الارض القطه بوسى اتخضت في ايه يافرخه صباح الخير برضه الفرخه قالت بصوت عالى
بك بك بكاااااااااك بك بك بكاك بك بك بكااااااااااااااااك ولسه رايحه جايه القطه قالت يانهار ابيض فيه ايه؟ صباح الخير يافرخه الفرخه قالت بصوت عالى بك بك بكااااك بك بك بكااااك
بك بك بكااااك وباضت بيضه واتنهدت وردت صباح النور يابسبوسه معلش اصلى كنت ببيض بيضه القطه كانت مذهوله وفرحانه فى نفس الوقت
اول مره تشوف الحكايه دى وقالت يااااااااااااااه دى الحكايه بسيطه خالص وجريت على مامتها
ياما ياماما ياماما الحقى ياماما انا اتعلمت ازاى الفرخه بتبيض بيضه انا دلوقتى أعرف ابيض بيضه
ماما بصت لها واستغربت وقالت يالف نهار ابيض ياصلاة النبى ياصلاة النبى بيضى ياختى
بسبوسه زعقت وقالت بك بك بكاااااك بك بك بكاااااااااك بك بك بكااااااااااااااك ومافيش بيضه
وحاولت تانى بك بك بكاااااااك بك بك بكاااااااااااااك بك بك بكااااااااااااااااااك
برضه مافيش بيضه القطه بسبوسه الصغننه كانت زعلانه خالص وحاولت كمان مره
بك بك بكاااااااااااااااااااك بك بك بكاااااك بك بك بكااااااااك مافيش فايده مافيش بيضه
القطه بسبوسه ماعرفتش تبيض زى الفرخه وساعتها ماما ضحكت وقالت
هههههههههههههههه ياحببتى القطه مابتبضش الفرخه بس هى اللى بتبيض علشان الفرخه من الطيور وزى ماانتى مابتعرفيش تبيضى الفرخه برضه مابتعرفش تصطاد الفيران بسبوسه فهمت واتعلمت درس كبير وان مش لازم نقلد غيرنا علشان ننجح المهم اللى احنا بنعمله مش اللى غيرنا بيعمله وتعلمت كمان ان ربنا خلق كل واحد لعمله وسهله عليه ويسره ليه علشان كده النبى صلى الله عليه وسلم قال (اعملو فكل ميسر لما خلق له)..