طرق مبتكرة لتزيين الحلويات

الحلويات
بعد خبز الكيكة ووضع طبقة من الكريمة عليها بحيث تغطيها وممكن أغطيها بشكل عشوائي غير متساوي وأوزع عليها الحلويات الملونة بتاعة الأطفال واللي ساعات بتكون منها أشكال حيوانات وأرقام وشخصيات كرتونية بتدي شكل مبهج

الفواكه
ممكن فرد الكريمة بشكل متساوي وتوزيع الفواكه المقطعة عليها زي الأناناس والفراولة والكريز والتوت والكيوي وممكن باستخدام قطاعات مختلفة على شكل قلوب وورود نقطع الفاكهة أشكال ونزين بها الكيك
كمان ممكن يتغمس نصها بس في الشوكولاتة السايلة وتتوزع على سطح التورتة

الشوكولاتة السايلة
نعمل أشكال بيها عن طريق وضعها في القمع وتشكلي بيها حسب ذوقك لكن لو مش متمكنة من الرسم بترسمي على ورق الزبدة وتقلبي الورقة بحيث تمشي بالشوكلاتة السايلة على الخطوط المرسومة حسب ما تحبي وتسبيها تبرد وبعدين بالسكينة المسطحة بتشيليها وتوزعيها على التورتة

فراشات من الشوكولاتة
بإستخدام ورق زبدة مقطع مربعات ومرسوم على كل مربع فراشة بتمشي عليها بالشوكلاتة وبتمسكي أطراف الورقة الاتنين وضميهم على بعض بمشبك وتسبيها تبرد على الوضع ده عشان تدي شكل فراشة بتطير

ورق شجر من الشوكولاتة
بتجيبي ورق شجر أشكال متنوعةوتغسليه وبفرشة تدهني عليه الشكولاتة وتسبيها تبرد وبعدين تجمديها وتشيلي منها ورق الشجر هتلاقي الشوكلاتة أخدت شكل ورقة الشجر بتفاصيلها وبتدي شكل رائع لما توزعيها على التورتة

ورق التزيين الجاهز
الورق بيكون مرسوم عليه أشكال بارزةبتفردي عليه الشوكولاتة السايلة ولما تتجمد بتشيلي الورق يتكون الأشكال وألوان اتنقشت على الشوكولاتة وبتدي أشكال مميزة في التزيين
ممكن قالب الكيك نفسه مايكونش مدور ممكن يكون على شكل قلب أو نجمة..