كيفية تقليل وقت الطبخ في نهار رمضان

‫#‏قمر_البيت_لكل_ست_بيت‬

المكونات
أكياس نايلون متوسطة الحجم لحفظ الخضار واللحوم - صينية فويل لحفظ الأرز أو المكرونة وممكن بيركس - ورق زبدة أو أي نوع ورق أبيض أو حتى ورق المطبخ اللي بيستعمل لشفط زيت القلي لشفط الرطوبة من الأرز أو المكرونة - ورق أبيض صغير أو تيكت لكتابة الصنف - لزق شفاف يوضع على التيكت أو الورقة المكتوب الصنف، ولو تحب التاريخ علشان لا تصله أي مية أو ثلج

الطريقة
نعمل جدول أسبوعي يشمل طبيخ الأسبوع أو أسبوعين بحيث ممكن نكرر الطبخة مرتين ( إما مرتين في الأسبوع أو مرة في الأسبوع حسب رغبة وتعود عيلتك )
بالطريقة دي لما نيجي نطبخ سنضاعف الكمية اللي بنطبخها في المرة الواحدة
نستنى لما الأكل يبرد خالص ثم نقسمه في الأكياس

* بالنسبة للخضار:
نقسم في كل كيس شوية خضار ونغلقه باللزق الشفاف ثم نلزق عليه التيكت مكتوب عليه نوع الخضار وتاريخ الطبخ وتلزقي عليها اللزق ( كتابة التاريخ هتساعد في استعمال الأقدم )

* بالنسبة للحوم والفراخ:
لو اللحمة مكعبات والفراخ مقطعة قطع صغيرة أو متوسطة أو شيش طاووق تعبأ بعد الطبخ عادي في الأكياس وتتخزن زي الخضار

..أما لو كانت شرايح فنعمل الآتي:
- نطبخ اللحمة بالطريقة اللي نريدها سواء في الصينية في الفرن أو مطبوخة بيكاتا بالصوص البني أو الصوص الأبيض أو أي طريقة تعجبك

- نفصل اللحمة من الصوص بحيث نرص اللحمة فوق بعض وجنب بعض بالترتيب ونبطط الكيس ونغلق الكيس برضه باللزق ولا ننسى أن ندون الاسم والتاريخ

- بالنسبة للصوص زي ما قلت قبل كده كترنا الكمية اللي طبخنها فلما نيجي نخزن نقسم الكميات في أكياس ونطلعها حسب الطلب. وعلى فكرة ممكن نطبخ أنواع كتير للصوص ونضعها على أنواع من الأكل زي المكرونات أو الفراخ المسلوقة أو المشوية... إلخ

- أما في حالة البانيه سواء فراخ أو لحمة فإما أن تخزن بعد التتبيل وبعد ما تغطى بالبيض والبقسماط أو ممكن بعد ما تتحمر كمان في كل الأحوال نفصل بين كل قطعة والأخرى بورق الزبدة أو الشفاف علشان القطع لا تلزق في بعضها ولا تقلقي في حالة عدم تحمير المخزون طلعيه من الفريزر قبل التحمير بثلاث ساعات وحمري على نار هادية
أما في حالة تخزين اللحمة محمرة فطلعيها من الظهر وقبل الإفطار نرش اللحمة بالمياه بالبخاخة أو ترش باليد وندخلها فرن دافي إلى أن تسخن أو نستخدم نفس الطريقة ونضعها في الميكروويف

* بالنسبة للمكرونة والأرز
يتم تخزينهم إما في أطباق أو صواني فويل أو بايركس، ويتغطوا بورق الزبدة أو ورق شفط الزيوت عند التحمير علشان تشرب الرطوبة ودايما لا ننسى التيكت بالاسم والتاريخ واللزق

* وممكن نطبق نفس طريقة حفظ الخضار لحفظ الشوربة
بعد ما نخلص كل الأكل وإعداده للتخزين ممكن نحضر ورقة ونكتب عليها أنواع الأكل المتخزن ونعلقها على الفريزر ولما نيجي نطلع كل طبخة نشطب عليها نحذفها بحيث نعرف الباقي
ومع تحياتى دعاء عاشور وكل عام وانتم بخير...