مكرونة بشاميل بالتونة

المقادير
علبة تونة مصفاة-كيس مكرونة أقلام-بصلة مقطعة قطع صغيرة-ملعقة كبيرة عصير ليمون-نصف كوب جبنة رومي مبشورة-ثمرة فلفل رومي مقطعة قطع صغيرة-2 ملعقة كبيرة زيت-جزرة مبشورة-ملح وفلفل

مقادير البشاميل
3 كوب لبن-نصف كوب دقيق-مكعب مرقة دجاج-2 ملعقة كبيرة سمنة-ملح وفلفل

الطريقة
1-لتجهيز البشاميل سيحي السمنة على النار وضيفي عليها الدقيق وقلبيه لمدة 5 دقائق أو لغاية ما تلاقي إن لونه بقى دهبي وبعد كده ضيفي عليهم اللبن بالتدريج مع مراعاة التقليب المستمر علشان الخليط ما يلزقش منك لغاية ما تحصلي على خليط كريمي وفي الآخر تبليها بالملح والفلفل ومرقة الدجاج وسيبي البشاميل على النار لمدة 5 دقائق مع مراعاة التقليب المستمر وبعد كده ارفعيه من على النار وسيبيه علشان يبرد
2-اسلقي المكرونة في مايه مضاف إليها ملعقة ملح وملعقة زيت بعد كده حطي المكرونة في مصفاة واغسليها بالمايه كويس وسيبيها علشان تصفي أي مايه فيها
3- شوحي البصلة على النار وضيفي لها الفلفل الرومي والجزر والتونة والملح والفلفل وعصير الليمون وسيبيهم على النار لمدة عشر دقائق أو لغاية لما تلاقي إن التونة شربت أي مايه موجودة فيها
4- هاتي صينية بايريكس وادهنيها بملعقة بشاميل وابدئي في وضع المكرونة ثم طبقة من التونة ثم طبقة من البشاميل وبعد كده الجبنة الرومي المبشورة وبعد كده دخلي الصينية في فرن ساخن لمدة ساعة أو لغاية وشها ما يبقى دهبي وبعد كده طلعيها واستني ربع ساعة وبعد كده قطعيها وحطيها في أطباق التقديم ....بالهنااااااااا.........