دجاج محشى ومشوى في كيس الفرن

#‏مطبخ_دعاء_عاشور‬

المقادير
دجاجه متوسطة أو أي حجم تحبيه - بطاطس وجزر للشوى
للتتبيلة
2 بصلة متوسطة - خل - ليمون - ملح وفلفل

للحشوة
نصف كوب رز مصرى - بصلة مبشورة - ملح وفلفل وجوزة الطيب - 2 ملعقة عصاج - 2 ملعقة زبيب ( حسب الرغبة)

الطريقة
هنغسل الدجاجه كويس بالدقيق والليمون وننشفها
هنبشر البصلتين ناعم جدا ونضيف عليهم الخل والليمون والملح والفلفل هنحشي الدجاجه بالتتبيلة كويس وندخل التتبيلة ما بين الجلد واللحم ونسيبها أكبر وقت ممكن تشرب التتبيلة ولو باتت في التلاجة ليلة يكون أفضل

نيجي بقي للحشوة
هنشوح البصلة في معلقة سمن لحد ما تصفر وبعدين نضيف الرز المغسول ونقلب تقليبتين ونضيف الملح والفلفل وجوزة الطيب وبعدين نضيف حوالي نص كوباية ماء ونوطي النار ونغطي لحد مايبقي الرز نص سوى وبعدين نقفل النار ونضيف العصاج والزبيب وكده تكون الحشوة جاهزة
هنجيب الدجاجه ونحشيها اربطى رجلها بخيط في بعض عشان متتفسخش وهي بتستوي وبعدين هنحط الدجاحه في الكيس ونحط معاها بطاسيتين وجزرتين متقطعين سميك ومتبلين بالملح والفلفل بيقي طعمهم رووعة لأنهم بيشربوا الصوص بتاع الدجاحه ونقفل الكيس بالربطة بتاعته ونخرمه من فوق 3 اخرام عشان الهوا الزيادة يخرج منهم ونحطها في صينية مرشوشة شوية دقيق عشان الكيس ميلزقش في الصينية وندخلها فرن حامي وقت حوالي ساعة ونص انتي هتعرفي انها استوت من نفسك لما تلاقي لونها وبعد ماتهدي نفتح الكيس ونقدمها ومع تحياتى دعاء عاشور وبالهنا..